Noticias

A concelleira de Cultura e Festas presentou esta mañán a segunda edición do ciclo SON DE VIGO, incluído dentro do programa de festas; a creatividade musical da cidade terá un lugar destacado coa celebración do festival do 30 de xullo ao 3 de agosto. Os grupos locais tomarán o escenario da Praza da Constitución durante catro días e darán paso a un gran peche no Auditorio de Castrelos con Os Resentidos e Siniestro Total en directo o venres 3 de agosto. A escena emerxente viguesa darase cita nos días previos na Constitución, do luns 30 ao xoves 2, da man dos grupos The Blows, Aries, Mónica de Nut, The Soul Jacket, Kaixo Sama VS Elecesar, Bflecha, Camarada Nimoy e Inculpados.

Un espazo propio e relevante para a música feita en Vigo dentro das festas de verán, esa é a filosofía do Son de Vigo, que trata de ser un punto de encontro para os artistas que desde a cidade proxectan o seu traballo cara novos mercados e públicos. Artistas con traxectorias consolidadas no seu terreo, novos grupos que emerxen na escena local, propostas case descoñecidas na cidade que atopan eco fóra dela e, como guinda, un directo de dous dos grupos máis relevantes na historia musical viguesa  e galega como son Siniestro Total e Os Resentidos.

Os concertos na praza da Constitución comezarán ás 22,30 horas e serán de entrada libre; o concerto do auditorio de Castrelos do venres 3 de agosto comezará ás 23,00 horas e o prezo para a zona de pagamento será simbólico: 2 €. As entradas poderán adquirirse no sistema de venda de Servinova e na Central de Espectáculos dende o vindeiro venres 27.

O Alcalde Abel Caballero presentou esta mañán o concerto que terá lugar o día 16 de agosto, ás 22,30 horas, no recinto feiral do Ifevi, ao que se subirán Joaquín Sabina e Joan Manuel Serrat para protagonizar o "gran" concerto do verán. O rexedor presentou o "mellor espectáculo musical do verán en toda España". As entradas para o concerto custarán 30 €.

Este venres día 29 de xuño, ás 19,30 horas, terá lugar na praza de Compostela a inauguración da Feira do Libro Novo, que contará nesta edición coa presenza das dúas bibliotecas públicas da cidade, a Biblioteca Central maila Biblioteca Municipal "Neira Vilas".

A feira, organizada pola Federación de Libreiros de Galicia e coa colaboración, entre outros, da Concellería de Cultura e Festas, estará aberta ata o 8 de xullo, en horario de 11,00 a 14,00 horas, e de 18,00 a 22,00 horas.

O xoves 28 de xuño, ás 12 horas, darase a saída a "Vigo, límite 36 horas" , un concurso no que as e os participantes terán que producir, rodar e editar unha curtametraxe sobre un mesmo tema: Vigo a través dos sentidos, nun tempo máximo de 36 horas. A súa interpretación é libre, permitindo que os participantes poidan expresar toda a súa creatividade a través dos seus proxectos. Contará con dúas competicións, unha de escolas e outra aberta ao público en xeral.

A saída terá lugar no Verbum-Casa das Palabras (Avda de Samil, 17) e estarán presentes Jorge Coira, presidente da Academia Galega do Audiovisual,  Fernando Jover, director da EGACI, e Isaura Abelairas, concelleira de Cultura e Festas.

A proxección e entrega de premios será o sábado día 30 de xuño tamén no VERBUM, ás 20,00 horas.