Noticias

Saúda do concelleiro

Benvido ao novo lugar da Cultura de Vigo. Nesta nova páxina, poderás atopar a información máis completa sobre todas as actividades de ámbito cultural, promovidas e/ou apoiadas pola Concellería de Cultura do Concello de Vigo.

Música, teatro, danza, exposicións, museos, cine... A oferta máis ampla para toda a cidadanía. Unha páxina que nace coa vocación de informar e, coas túas suxestións, medrar continuamente e converterse nun espazo de referencia na nosa cidade. Porque a cultura é parte da nosa educación.

Esperamos que sirva para estar ao corrente da vida cultural municipal.

Cayetano Rodríguez Escudero
Concelleiro-delegado da Área de Cultura
Concello de Vigo

Ampliación horarios por exames na Biblioteca Pública Juan Compañel en xullo e agosto

Co obxecto de facilitar o estudo polo periodo de exames e o uso das instalacións públicas, a Biblioteca Pública Juan Compañel (r/ Joaquín Yáñez, 6), en colaboración coa Concellería de Cultura, ampliará o horario de apertura da súa Sala de Lectura, según o seguinte:

 

Periodo de ampliación: do 1 ao 18 de xullo, ambos inclusive, e todo o mes de agosto

 

Horarios ampliados durante ese periodo:
Luns a venres, non festivos: de 16:00 h a 20:00 h

A Biblioteca Municipal Neira Vilas lanza unha nova plataforma de préstamo online de audiovisuais

O Concello de Vigo pon en marcha EFILM VIGO ( https://vigo.efilm.online/es/vigo/ ), unha plataforma online exclusiva para bibliotecas destinada ao préstamo de cinema, documentais, concertos, series, animación e curtametraxes, que permite o acceso legal e gratuíto a un amplo catálogo de contidos de calidade con máis de 27.400 títulos, 24 horas ao día e 7 días á semana, dende calquera dispositivo con conexión a Internet. Todos os contidos están accesibles en streaming, sen necesidade de descarga.
 
Este innovador proxecto a nivel Europeo  supón un paso máis na implantación de servizos dixitais na biblioteca pública e o afianzamento dun novo modelo, tanto de prestacións bibliotecarias en torno ás novas tecnoloxías da información, como de relación cos usuarios, que xa non teñen necesariamente que desprazarse á biblioteca para tomar en préstamo os documentos que son do seu interese. Así, este servizo é complementario de todos os demais que tradicionalmente xa vén prestando a biblioteca pública, e afonda na posibilidade de garantir o acceso universal, directo e democrático de toda a cidadanía á información e ao lecer, neste caso a través dunha programación cinematográfica variada, de calidade e con todo tipo de contidos culturais (documentais, entrevistas, concertos, teatro, etc.)
 
Para poder dispor de EFILM VIGO é necesario:
  • Ter carné da biblioteca e solicitar presencialmente na BPM Xosé Neira Vilas a inscrición en EfilmVigo, onde se facilitarán as claves de acceso.
  • Ter polo menos 14 anos de idade.
  • Ter un dispositivo compatible e unha conta de correo electrónico.
 
A dispoñibilidade de audiovisuais é inmediata e, unha vez efectuado o préstamo, o usuario dispón de 72 horas para poder visualizar o audiovisual cantas veces desexe. Os préstamos poden ser simultáneos, é dicir, un mesmo usuario pode solicitar ao mesmo tempo todos os préstamos que teña dispoñibles, e ao mesmo tempo, múltiples usuarios poden solicitar préstamos dun mesmo audiovisual sen restrición algunha.
O usuario pode consultar en todo momento o número de préstamos que aínda ten dispoñibles entrando na súa conta e EFILM VIGO coas súas claves de acceso.

Ampliación horarios por exames na Biblioteca Pública Juan Compañel en maio e xuño

Co obxecto de facilitar o estudo polo periodo de exames e o uso das instalacións públicas, a Biblioteca Pública Juan Compañel (r/ Joaquín Yáñez, 6), en colaboración coa Concellería de Cultura, ampliará o horario de apertura da súa Sala de Lectura, según o seguinte:

Periodo de ampliación: xoves 2 de maio ao domingo 30 de xuño, ambos inclusive.

Horarios ampliados durante ese periodo:
Luns a venres: de 20:30 h a 24:00 h
Sábados: de 16:00 h a 24:00 h
Domingos e festivos: 10:00 h a 14:00 h

Peche provisional da Biblioteca Juan Compañel o sábado 20 de abril

Infórmase que a Biblioteca Pública Juan Compañel (r/ Joaquín Yáñez, 6) permanecerá pechada, por motivos de seguridade, o sábado 20 de abril, debido aos labores de desratización, desinfección e desinsectación, levados a cabo pola Consellería de Cultura, Educación e Ordenación Universitaria.

O luns 22 de abril a biblioteca xa funcionará nos seus horarios habituais.

Nova edición do festival da música e das artes "Nas Ondas"

A Concellería de Cultura colabora un ano máis co Conservatorio Superior de Música de Vigo para organizar o Festival da música e das artes "Nas Ondas", que se extenderá ata o 22 de xuño, con distintos ciclos de programación de concertos e actividades. O certame terá como espazo principal o Auditorio "Martín Códax" e dependencias do CSMVigo, pero tamén se trasladará puntualmente a outros lugares da cidade, como o Auditorio Municipal do Concello ou o salón de actos do MARCO, entre outros.
 
O festival integra a presenza de numerosos docentes internacionais a través do programa Erasmus+. Trátase en definitiva dun programa transversal que trata de dar conta da multiplicidade das accións desenvolvidas dende o CSMVigo a prol dunha acción formativa, pero tamén social e cultural, comprometida coa cidade e máis alá.
 
"Nas Ondas" concentra unha programación que se organiza nunha serie de ciclos: comezou coa Semana da Música Antiga, a cal rematará o vindeiro 27 de marzo ás 20:00 horas co II Combatimento, Orquesta Barroca do CSMVigo e Convidados Erasmus+. Nos meses sucesivos os ciclos que o conforman serán: De Piano, Explurart, Letras Galegas e Abrente, destacando as actuacións da Orquesta Sinfónica do CSMVigo (4 de abril) e o Concerto Extraordinario fin de Trimestre (12 de abril).

A través do programa Abrente, que se desenvolve en paralelo aos ciclos do festival, o CSMVigo establece colaboracións con outros centros e institucións, e intenta achegarse tanto a públicos especializados na música, como á cidadanía en xeral.

O Concello renova o seu apoio ao III Concurso Internacional de Piano "Cidade de Vigo"

Esta mañá presentouse a III edición do Concurso Internacional de Piano "Cidade de Vigo", un certame de grande prestixio a pesar da súa xuventude que se celebrará entre o 16 e o 20 de abril no Conservatorio Superior "Martín Códax". O concurso conta coa dirección artística de Pablo Galdo, presidente da Asociación de Música Clásica de Galicia.
 
Unha das sinais do recoñecemento internacional deste evento é, ademais do importante número de participantes, a calidade do seu xurado. Este ano contará con nomes tan destacados como Martha Argerich (Arxentina) -presidenta-, Nelson Freire (Brasil), Tamás Vásáry (Hungría), Sergio Tiempo (Venezuela); ademais do propio Pablo Galdo.
 
 
Entre o 16 e o 20 de abril desenvolverase o certame que este ano recibiu case 400 aspirantes de 53 países do mundo, converténdose no segundo concurso do século XXI con maior número de inscritos. Tras a selección, serán algo menos dun centenar os músicos que midan a súa calidade artística en Vigo. O concurso non ten límite de idade e haberá premios para as distintas categorías.
 
Entre os países con maior número de candidatos inscritos están España (33), Rusia (28), China (27), Italia (20), Ucrania (19), Xapón (17), Brasil (17), Francia (15), Arxentina (12), Estados Unidos (12), Corea do Sur (12) e Polonia (11).

Entradas esgotadas para o programa especial "3x3" do sábado 2 de marzo no Auditorio Municipal

Infórmase que as entradas para a función do programa especial "3x3", prevista este sábado día 2 de marzo ás 21:00 h no Auditorio Municipal do Concello, están esgotadas. Por este motivo, o despacho de billetes do auditorio só funcionará ese día para a recollida das entradas vendidas anticipadamente.

A Orquesta Clásica de Vigo conmemora cun programa ecléctico e contemporáneo o seu 35º aniversario

Coa colaboración da Concellería de Cultura, a Orquesta Clásica de Vigo conmemora este ano o seu 35 aniversario con seis concertos singulares, que pretenden ofrecer unha visión ecléctica e
contemporánea da música sinfónica.
 
A innovadora proposta da agrupación para esta temporada comezará o vindeiro 7 de marzo cun concerto en torno a dous grandes compositores coetáneos, Maurice Ravel e Vaughan Williams. Esta cita, que terá lugar no Teatro Afundación ás 20.30 horas, estará dedicada a un dos compoñentes da Orquesta Clásica de Vigo, que faleceu recentemente.
 
A seguinte sesión celebrarase o 6 de abril no Auditorio Municipal do Concello de Vigo, cunha viaxe musical ao universo de Purcell, Vivaldi e ao do primeiro Haydn. En maio, a formación presentará a obra de dous compositores coevos, Francis Poulenc e George Gershwin, no Teatro Afundación.
 
Beethoven e Mendelssohn serán os protagonistas do concerto do 12 de outubro no Teatro Afundación, onde se interpretarán as conexións entre a música sinfónica de ambos autores. Na programación tamén haberá espazo para un proxecto que conxugará electrónica, audiovisual e música clásica denominado Práctica Electroclásica, que se poderá ver no MARCO o 16 de novembro.
 
A temporada pecharase o 28 de decembro no Teatro Afundación co tradicional Concerto Extraordinario de Nadal, no que se combinará música de Sibelius coa banda sonora de Harry Potter, composta por John Williams.
 
Todas as propostas do ano no que se cumpre o 35 aniversario da Orquesta Clásica de Vigo están fiados entre si, agrupados por contrastes e artistas complementarios, nunha programación que busca conectar obras de distintas épocas e estilos para xerar lecturas únicas no público grazas á confrontación das diversas creacións.

Entradas esgotadas para o programa especial "3x3" do venres 1 de marzo no Auditorio Municipal

Infórmase que as entradas para a función do programa especial "3x3", prevista o venres 1 de marzo ás 21:00 h no Auditorio Municipal do Concello, están esgotadas. Por este motivo, o despacho de billetes do auditorio só funcionará ese día para a recollida das entradas vendidas anticipadamente. Quedan todavía entradas dispoñibles para o mesmo programa o sábado 2 de marzo a través do servizo de Ticketea.

Páxinas

Subscribe to Noticias